قصيده اعجبتني واتمنى تعجبكم ...
يارفيقي ماعلى الدنيا حسافه
في ربيع العمر خذ مني نصيحه
يمكن اني جيت من باب اللقافه
واللقافه للبشر عيب وفضيحه
لكن الدعوى بسيطه والمسافه
اقرب من الدمع للعين الجريحه
والله ان قلبي مقر للنظافه
ومن تكلم في قفاي الله يبيحه
الكتاب يبين شرحه من غلافه
وما يعيش الا من اخلاقه صريحه
الهوى في ذا الزمن كله سخافه
والنفوس بحبها صارت شحيحه
والمذله فالهوى للعمر آفه
والجمل لي طاح يامكبر مطيحه
من يوقف في طريقك لاتخافه
دوس قلبه وابتعد بأرض فسيحه
واحد شغله مثل شغل الصحافه
لو ينابح لاتفكر في نبيحه
كلم الجهال بلسان الثقافه
ازرع الريحان واستمتع بريحه
ولاتصدق واحد هرجه خرافه
أكثر علوم البشر ماهي صحيحه
وان غدا لك في شقى وقتك كسافه
والله اني فزعتك في كل صيحه
قالها اللي كل شي بالعين شافه
وصاغ لك ماجاد به فيض القريحه
